من الاعمال الكاملة لفؤاد حداد نقلنا لكم زجل بعنوان ( الدم واحد)
يا بيوت فقيرة آه يا جيرة و سكن
أصل الجزيرة ف تراثنا وطن
و بنادى يا صنعاء ف عصر المكن
و الاشتراكية و عدوة مصر
و البندقية منجدة للفاس
يا بيوت فقيرة ليه هدمتى القصر
قالت عشان نبنى لكل الناس
الدم واحد قلبى يعصر عصر
لا النيل يجف و لا النخيل ينداس
أنا فى نضالك ضاالع الاحساس
لما أتمزع كفنك ف يوم النصر
من كتر ما أتأخر عليكى العصر
منى أتمزع لك ضلع ويا الكفن
يا بيوت فقيرة آه يا جيرة و سكن
و الحرب قامت من شجن ف كفن
دم السعادة نفس دم الشقا
و مهيش ضريبة دى متجزأة
لمينا أيامنا اللى متبعزقة
و لميت سنة قدام دفعنا التمن
شمس العروبة تشع
و الدم ينطق شعر
يا كبد مصر و آه يا كبد اليمن
لو تسمحو لى بالكلام و النشيد
يا الشعر الابيض آه يا أم الشهيد
أم العريس خزيانة تلبس جديد
من غير ما يظلم حد قلبى شريد
و ما أظنش ابنى يعيش ف بيتنا سعيد
يا طفل لما يحرموك اللبن
و أنا قلبى زى الفل
و انا دقت طعم الذل
و نا ماتلى ناس بالسل
و أنا ماتلى ناس بالطاعون
أقدر أغنى بكل
قلب و جسد مطعون
و ألعن طغاة الأرض
و اطرد عليهم طرد
دم الشرف و العرض
كائن طغى ما يكون
أدى معدن الثورة بيطرق عدن
و صناعة الثورة ف باب صنعاء
تسرى القبايل كلها جمعاء
على تار مبيت من قديم الزمن
زحفت جيوش التار جيوش الانتقام
زحفت حصى دم و حجر أهرام
تصرخ أبوى و كلنا أيتام
تصرخ يا أمى و ملقيتش الكلام
لا القلب قلب و لا صمامه صمام
و لا شهر ف قلب الفواجر حرام
يا بيوت فقيرة و يا نسب و خيام
يحلا الليلادى كل مر ادام
من حسن ليلة شفت مدفع قام
ساند عليك و دك قصر الامام
ليلة يمن بكرية الايتام
عدد النجوم عدد البشر أحلام
و دى تبقى آخر حرب أول سلام
نبقى دفعنا لميت سنة قدام
و يا جيش بلادى سارياً فى الظلام
اتقن حياتك أتقن الاعدام
فى كل عابد مال و عابد وثن
الجمهورية دوست ع الطغاة
تسلم لنا تسلم لأمك و أبوك
مولود بدمك لمت ابنى اتحضن
مولود بدمك لما ابنى امتحن
مولود بدمك فى صياح الديوك
فجر العروبة شع
مولود بدمك شعب
يا كبد مصر و آه يا كبد اليمن
