ترومبيت من اشعار سيد حجاب
المحزنة منصوبة...و الجنازة ماشية من سنين
مين اللى مات؟!
الحزن ملو كل بيت...القهر ف العينين
ثورة عرابى طفو نورها الجبنات
و صوت حزين حزين
بيبكى كل المقتولين
بكا...بكا...بكا...بكا
الذل طابع كفه ع الخيام
ضاعت فلسطين انزفو يا لاجئين
مشردين
وسط الرياح الااربعة مشردين
لا نجم يهدى الخطوة و الضلام
مال فوق كتفهم و اتكا
بكا..بكا..بكا..بكا
2
من بين عويل الويل...و أحزان الليالى المظلمة
بتقوم شعوب الأرض زى المارد النبيل
رعود ..بروق تملا السما
تملا البرارى صرخة هدارة و سيل
تصحى البراكين القديمة
تصول خيول الفيضان
تصحى الارض البور ترفرف الرايات بدم الشهداء
تتفتح القبور
يطل شهداء العصور
شهيد ورا التانى و تانى للفدا
الدم الاحمر و الرايات الحمرا و النيران
كل الفقارى المممصوصين يتجمعو
و المية بتهد السدود السودا و تغير عماوة الزمان
و صوت ترومبيت الفدا يملا الميدان
صوت الترومبيت اسمعو
3
ايدين عفية بتفتح البيبان
العالم الانسان
وردة فى ايد محبوب و ايد تضم ايد
ضمة حنان
ايدين بتبنى الغد..و تكسر جدار المستحيل
درب و سبيل
بيقرب الحلم البعيد
و اشرب يا عطشان السبيل
اشرب يا عطشان السبيل
