من أشعار سيد حجاب نقلت لكم هذا الشعر بعنوان (كلمة الشعب)
أد إيه بحلم اشوف الكلمة جاية
من عروق الشعب من درب السعادة
من مواويل النخيل جنب القناية
من بكا النيل ف السواقى
لابسة أحلاها طواقى
لابسة عفريتة صنايعى معجبانى
سايقة محرات كهربائى
أد إيه بحلم أشوف الكلمة جاية
جايبة من أسوان دهبها الاسمرانى
و تعبها الاسمرانى
جايبة من الفيوم عنبها السكرانى
من رشيد الملح م النوبة ترابها
من دموع فرح بلدنا ف بورسعيد
جايبة الأغانى
آه ياكلمة شعبنا ف صدر الجرايد لعلعى
اطلعى من ضلعنا و اتفرعى
معجبانية و شقيانة و عفية
لا انتى حرباية و لا بوشينو لا بنت زوانى
و إحنا ماشيين ناحية الشمس اللى بتقرب علينا
إصبحى سكة بشجرها الأخضرانى
أد إيه بحلم أشوف باب الجرايد ينفتح
و السنابل داخلة شايلة فلاحينها
و المصانع ايدها ف ايدين شغالينها
افتحو الباب
....للصنايعية الفولاذ و الفلاحين
افتحو الباب و اسمعو
شعبنا دلوقت هيقول كلمته
...كلمة ب ايدين
!شعبنا ما أجدعه!
